نقاط على الطريق..
النقطه الأولى
لما نتيجة الثانوى العام بتظهر وكل طالب متفوق الأول أو التانى على الجمهوريه واصحاب الأرقام القياسيه بتظهر نغمه سخيفه اوى مش بحبها تلاقى على السوشيال ميديا ومواقع التواصل بتقول ايه أن بنت البواب الأولى على الجمهوريه وابن الفلاح الأول مكرر وبنت السواق وابن الحلاق وكتير من المهن البسيطه ونعيد ونزيد ونشير ومش عارف ليه ، طيب عايز اعرف لو كان ابن رجل الأعمال فلان الفلاني كان الأول وبنت الدكتور المشهور الأول مكرر كنا عدنا وزدنا وشيرنا يمكن مش القصد التقليل من المهن بالنسبه للى بيشير بقدر ماهى رساله لتحفيز كل الطلبه اللى اهاليهم بيشتغلوا فى المهن البسيطه دى وتكون حافز لهم بس انا شايف انها بتبقى اوفر اوى وبتستعرضها الميديا بطريقه مش بحبها يعنى تلاقى المذيع بيدوس اوى ويقول بنت البواب بنت البواب يرددها اكتر من مره هوه فيه ايه لولا البواب والفلاح والحلاق والسواق ما كانش هيبقى لا أنا ولا انت كلنا محتاجين لبعض وكلنا بنكمل بعض واولادهم تعبوا وذاكروا وكافحوا وحاسين بأهاليهم وعارفين ( القرش جاى ازاى ) بالتعب والعرق والحرمان يعنى البواب والحلاق والفلاح ييجوا عليهم ايام بيناموا من غير ما يتعشوا علشان يصرف على اللى شرفه ورفع رأسه وسط الناس والمجتمع اللى بيبص على المهن ده وبينه وبينها سوء تفاهم كفايه أن الأولاد المتفوقين دول بيتحملوا المسئوليه وعارفين القرش بييجى بطلوع الروح مش هات يا بابا اشتراك النادى وأغير العربيه ولا هاتى يا ماما علشان الكوافير ولا الكلام ده وياريت الدوله تبص على الطلبه المكافحين دول وترعاهم وتوفر لهم كل الدعم والرعايه ويفتكروهم فى الدراسه الجامعيه دى اقل حاجه تعملها الدوله مش تفسحهم وتركبهم الطياره وبعد كده كل واحد على بيته واللى بينى وبينكم انتهى لحد كده الإستمرار والرعايه طريق التميز والنجاح .
النقطه الثانيه
من فتره وجهت إنتقاد لصفحة مركز شباب الخياريه وقلت انها بتجامل وتفتقد المهنيه وتشبه الصفحات الشخصيه وقامت الدنيا عليه ومارديتش لأن كل حاجه قلتها فى البوست مقتنع بيها واكتفيت بقرأة التعليقات والحق اقول إن الصفحه تصب إهتمامها على البطوله وأحوال الفرق المشاركه وأخبارهم والصور والنجوم والمعلقين والحكام ورئيس مجلس الإدارة راح وعمل وأبدع كل ده جميل ومناسب لما أنشأت من خلاله الصفحه طيب فتحتم المجال للمناسبات المختلفه الأفراح المأتم والنجاح والتفوق وابن فلان هيعمل ايه وابن علان وصل لايه وكل ده جميل بس انا ملاحظ ان معظم المناسبات دى للناس المعروفين والمشاهير ومن يخصهم حتى لو قريبه من بعيد انما لوفيه مناسبه لابن واحد بسيط طبعا ما نعرفوش ولا حد هيعبره ولا يعرفوه او ابن واحد معروف مثلا يكون ناجح فى الثانويه وجايب مجموع كبير هتعملوا من بنها وهتأملوه انما لو كان من حبايبكم هتصيتوه دى نقطه والنقطه التانيه انتظرت يوم والتانى والتالت أن البوست يتعمل ويكون بوست محترم يشمل كل المتميزيين المتفوقين فى الثانويه العامه وصورهم وصور أهاليهم وتقوم الصفحه تدعوهم لإحتفاليه وتكريم ويتعملهم ( قاعده ) زى القاعدات اللى بنشوفها كل يوم والتانى لقيت إهمال ولا حس ولا خبر ولاحتى كلمه مبروك يمكن يا ادمن الصفحه الطلبه وأهاليهم كانوا منتظرين البوست ده وإهتمامكم بهم وتهنئة الرئيس التاريخى لهم ويعمل لهم فيديو تحفيز ويقول لهم مبروك بعد النتيجه على طول ويهنيهم ويقول كلمه حلوه مش عايز اظلمه ( يمكن مش فاضى ) هوه فيه ايه مش إنتم فتحتوا باب المجاملات والصور وصيد الكاميرا يبقى على الكل العنتيل عندكم ( والواسطه ) زيه زى اى شخص عادى ( مالوش واسطه ) وحتى لو مالوش علاقه بمركز الشباب ولا له صوت فى الجمعيه العموميه بس هوه من القريه وله مناسبه المفروض يتعامل زى العنتيل والا نقفل باب المجاملات ونخلص ونريح رئيس مجلس الإدارة أنه يوجهة التهنئه ويتفرغ لعمله الله يكون فى عونه وكمان المسئول عن الصفحه ايده ترتاح من الكتابه ( علشان ماتوجعوش )
