إنجي يوسف تكتب:
بالعامية….لمحات رمضانية
ليه كل حاجه فاتت بشوفها اجمل واحلي وليه دايما بنعيش عالذكريات ومش بنقبل الواقع. عشان احنا مش بنقدر قيمه اللحظه اللي بنعيشها. رمضان زمان اجمل كلمه كلنا بنقولها بحاله من الشجن وببصعب علينا رمضان اللي بنعيشه عارفين ليه عشان رمضان زمان كنا اصغر وكان معانا اهالينا وكنا مش شايلين هم ولا مسئوليه وكنا بنشوف كل حاجه جميله كان رمضان له ريحه في كل الشوارع. الخيم الرمضانيه والخروج والفسح. كنا ابسط من كده بكتير. ماكانش في ناس بتتمنظر بعزومات ولا لبس ولا اماكن خروجها وشيكاتها اللي بتدفعها. كانت اكله بسيطه وفسحه جميله مع اهالينا واصحابنا. بتطيرنا للسما. كانت كبايه سحلب في اي كافتريا. او كوبايه حمص الشام عالنيل عندنا بالدنيا كانت الاعلانات زمان عن سلع بسيطه ونقدر عليها كانت المسلسلات بتتصور في بيوت بسيطه شبهه بيوتنا كنا بنلبس زيهم ولو شفنا حد لابس اوڤر نقوله ايه انت هتعمل فوازير رمضان كنا بنحب بعض ونتمني الخير لبعض. كانت الناس بتنزل تصلي حبآ في الصلاه مش منظره وموضه. كنا بنصوم عشان نرضي ربنا مش عشان مكسوفين نفطر ادام حد كان في كنافه وبسبوبه وبلح الشام طعمه اجمل مليون مره من كنافه المانجه اللي بمبلغ وقدره كان الاكل له طعم عشان كان في الناس اللي محليه الدنيا في عنينا عيشوا كل لحظه بحب عشان اللي مش عاجبنا دلوقتي بكره نترحم عليه ونقول كان رمضان زمان احلي. احنا اللي نحلي الايام ونجمل ذكرياتنا عشان وقت ما نحتاج نشم ريحه زمن وناس. نقدر نسترجعه واحنا مبتسمين وعيونا بتلمع من الفرح. رمضان احلي مع حبايبا. في اي وقت بس احنا نحب
