رؤوف قنش يكتب:
تابلت الثانوية بعافيه شويه
اسمعوا يا سادة وزير التعليم جاء بالخبر اليقين قال لازم نطور التعليم علشان الأجيال يبقى لها شأن كبير وعلشان نطوره يبقى التكنولوجيا لها عامل أساسى فى التطوير والله يا اخى كلام جميل ما اقدرش اقول حاجة عنه طيب ياسيدى وبعدين وبعد مشاورات ومداولات والشد والجذب ربنا هداه لفكرة ادخال التابلت وتكون ضربة البداية ( وحقل التجارب ) عند أولى ثانوى الصراحة انا معاك فى التطوير ده وانا بأيد الفكرة دى واعتبرها كويسه جدا والحمد لله أن فيه وزير اصلا بيعرف يفكر ويبدع من زمان ما شفناش الحاجات الحلوة دى مع اننا كشعب مصرى بنخاف من التطوير ونخاف من كل جديد ونخشى التجربة ده حالنا كمصريين بس أسأل سؤال ( واقف فى زورى ) ازاى تقدر كوزير ومسئولين تحموا الفكرة دى وتطورها والطالب يستجيب لها ويحبها ويقبل عليها؟ وامتى تنتهى من حياتنا جملة ( السيستم واقع السيستم واقع ) اللى بقت الجملة دى موجودة فى كل مكان نروحه اى والله زى ما بقولكم كده اذا كان بنك او مكان حكومة لإستخراج مستند رسمى أو الفرن علشان اجيب رغيف العيش اكله انا وولادى انا بقول خلى السيستم واقع وربنا يقومه بالسلامة وتكون إصابتة خفيفة وهدعيلة فى كل صلاة أن ربنا ياخد بايده وشوف الأهم والأفيد أن الطالب يلاقى ديسك محترم يقعد عليه يكون خالى من المنحنيات والمطبات وشوف طريقة ازاى تقضى على كثافة الفصول وازاى تطور الكتاب المصاب بالعشوائية والحشو والكلام الركيك اللى لايودى ولا يجيب وشوف ممكن تعالج الطالب ازاى اللى مش عايز يروح المدرسة فى الأصل ونفسيتة بقت ( زى الزفت ) ومتعقد منها الطالب دلوقتى ياسيادة الوزير لو فتشت شنطتة هتلاقى فيها العجب هتلاقى برشام ومخدرات وأسلحة وصور مش عارف ايه ولو فتشت موبايله هتلاقى ( ولا بلاش ) طبعا اقصد بعض الطلبه الحاجات ده كفيلة انها تهدم المجتمع اللى سيادتك عايز تطوره وتطور مفهومه وياريت كمان تشوف ازاى تنمى مهارات الطلبة ده لو لقيت عندهم مهارات ومش عارف هيكون عندهم مهارات ازاى ومستوى التعليم اصلا ماعندوش مهارات والقائمين على تطويره من ايام الخديوية لسه بيفكروا ومش عارف والله هيخلصوا تفكير أمته ده اذا كانوا بيفكروا اصلا وياريت تفكر تعمل فى المدارس حمامات تكون محترمه تليق بادميتهم وكمان تلميذ الإبتدائي ما بيصعابش عليك وهو شايل على ضهره شنطه اتقل من جسمه وماشى ينهج وعرقان وحالتة تصعب على الكافر والنبى قولى التلميذ دة بالشكل ده يستوعب ازاى وتقولى نطور يعنى تطور وتهد حيله الحزين يبقى فايدة التطوير ايه ياسيادة الوزير طيب قولى اخبار المدرس ايه وحالتة عامله ازاى المدرس مش طايق نفسه ولاطايق الطالب ولاعاجبه المرتب ولاعاجبه حتى الفلوس اللى بياخدها من الدروس الخصوصية ولا عاجبه حاجه خالص وفشلت انت وغيرك فى القضاء علي الظاهره دى غير ( الشومة ) اللى شايلها فى أيده رايح جاى انت بقى فكرت ليه المدرس وصل للمرحله دى وازاى أطور المدرس وأعمل له دورات تدريبية واكبر وارفع من مستواه علشان حتى الطالب يحترمه ابدا ما فكرتش سيبته فريسه ومتصدر المشهد زى الصوره اللى بنشوفها على كتاب سلاح التلميذ والله عيب لما يكون التعليم فى مصر بالشكل المهين ده وبعد كل ده والمهانة والإهانة عايز تستعرض عضلاتك وتدخل ( التكنولوبيا ) قصدى التكنولوجيا والله انا معاك انك تطور ويكتب اسمك فى كتب ( التاريخ والجغرافيا ) بس بعد ما تعمل التطوير اللى بجد الهيكل الأساسى للتعليم البنيه التحتية المنظومة التعليمية عامله زى( شبكة المجارى ) كله مودى على كله لافيها تحكم ولا سيطره طور التعليم من خلال إنشاء مدارس محترمة تستوعب كل الطلبه طور المناهج ( التعبانه ) وبقالها فترة كبيرة جدا حتى الأطباء فشلوا فى وصف العلاج الشافى شوف الطالب اللى المدرسه بالنسبه له بقت عامله زى ( السجن ) من كله منهج معامله ديسك مش محترم حتى التهوية معدومه معدموه يا ولدى وهلم جرا سيبك من فكرة التابلت ولو مؤقتا على ماتشوف له حل لأن الطالب نفسه بقى معقد من ناحيتة ومش عايز يشوف ( خلقته ) حتى طالب الإعدادية اللى عايز يروح ثانوى بيتكلم عن التابلت اكتر ما بيفكر فى مكان مدرستة الجديده هيكون مكانها فين مش عيب ترجع فى كلامك انما العيب انك تصر على كلامك واستجيب للشارع وشوف بيقول ايه وخليك ديمقراطى مع الأغلبية وياسيدى اهو التابلت معاك وخليه معاك وطور فيه زى ما انت عايز وعلى أقل اقل من مهلك احنا يعنى هنروح فين من بعض ومتشكرين اوى على تعبك وعلى العموم براحتك احنا والله مش مستعجلين ياعم طارق رمضان كريم وربنا هوه المعين
