يكتبها اليوم:رؤوف قنش
تلغراف الى
احمد منصور
اوعى تستغرب لما أقولك بكره ان شاء الله ( تاريخ ) ميلادك وكلية الأداب جامعة المنصوره ( مكان ) الميلاد ومناقشتك رسالة الماجستير هى ( شهادة ) الميلاد اللى هتتعامل بها وهتكون جواز مرورك للمستقبل علشان لكل مجتهد نصيب وعارف إنك مجتهد وعلشان كده هيبقى لك نصيب عارف ليه علشان حضرتك إبن بار اولا لعلمك النافع ثانيا علشان انت تربيه مين ؟ ايوه كده الله يفتح عليك تربية إمام الأئمة العلامه طبعا انت عارف انا اقصد مين وبركاته هتهل عليك وهتكون معاك بكره وياريت وانت داخل حجرة المناقشه تدعيله وتذكره بالخير هيكون التوفيق من نصيبك طيب جرب كده هتلاقى نفسك كسبان موفق يامولانا .
دورة الخياريه
من وجهة نظرى أسوء دوره صيفيه نظمتها الخياريه من سنين فشل وتخبط إدارى واضح وكبير وفاقده الإلتزام جعلت الفرق مش طايقه بعضها العيب فى مين هوه العيب فى الفرق المشاركة ولا المنظمين كل يوم معارك شغاله تخيلوا الناس بتتفرح دلوقتى على معارك مش رايحه تستمتع بكورة القدم كل مباره دلوقتى بقت معركه مشاكل ضرب سب قذف وقاحه قلة ذوق وعلى عينك يا تاجر شطب وحرمان وقطع علاقات شغال والحق بيروح مع الباطل لدرجة أن قبل اى مبارة ماتنتهى المتفرجين يسألوا ( فين الشكله ) هيه إتأخرت ليه عايزين نتفرج معقول كده ملعب الخياريه أصبح ساحه للعراك والشجار والسب والقذف وبحذر كتر المشاكل هتقلب بغم وكارثه ممكن لاعب أو مشجع لاقدر الله يموت فى قلب الملعب يبقى التصرف ايه وإسألوا فادى فون وسرسو البرامون البداله وشاوه وامبارح كفر البرامون ومنية سندوب ايه اللى حصل معاهم وربنا ستر وكان معانا وبعت لنا إنذار اكتر من مره ومش واخدين بالنا دورة الخياريه كانت كل البلاد بتنتظرها حتى لو مش فرقتهم مش مشاركين كنا بنلاقى الجمهور ( حكاية ) ايه اللى حصل ؟ البطوله على أرض الخياريه بقت تخوف وعليها علامات إستفهام كبيره والحل بسيط اوى ومش شايفينه ومش عايزين نشوفه ( نعطى العيش لخبازه ) بس هنقول لمين ده هانى رزق ياعم يعجن ويخبز ويطلع العيش من الفرن وياكل ويحلى كمان عايز يعمل كل حاجه بنفسه عايز يبقى كل حاجه أيده على كل حاجه وعايز يسيطر ومسيطر فعلا وبيغلط وعايز كل الناس تشاور عليه هوه بس ويقولوا هانى هانى خلاص نلغى مجلس الإدارة خالص ونعمله باسمه ويقعدوا فى بيوتهم اكرم لهم وبعيب على مجلس الإدارة سلبيته وعدم التفاعل مع القرارات اللى بيصدرها الحاكم بأمره والمشكله أن فيه أعضاء بعيده اصلا عن المجلس وبتؤيد القرارات عجيبه دى اسوء دورات بتتعمل دلوقتى فى الخياريه لأنها بقت بتغرق مش بتجمع زى الأول القرار فى النهايه قراره ياجماعه كده والله غلط لازم يبقى لكم رأى وكلمه وصوت وتثبتوا وجودكم او نفضها سيره وكله على بيتك انا مش ضد هانى اللى بيسعى لتطوير المنشأه وظهورها بالشكل المحترم وانا أشادت بيه كتير وقلت فيه شعر وكتبت كتير من المقالات لصالحه انا ضد هانى وقراراته الغلط العنتريه الإنفراديه اللى أصبحت موضه وهتودى مركز الشباب فى داهيه وكل اللى اتعمل هيبقى صفر على الشمال مالوش قيمه .
