تلغراف الى
يكتبها:رؤوف قنش
( الزمالك )
فاضل على الحلو دقتين ايوه دقتين دقه فى المغرب ودقه فى برج العرب دقة بركان ودقه زلزال وجمهورك مستنى على نار ومحتاج يفرح بالكنفدرالية خدوا بالكم من البركان وربنا معاكم وتعملوا زلزال .
( جروس )
جمهور الزمالك وبالنيابة عنهم العندليب شوقى عبد المنعم بيقولك ابوس ايدك بلاش تفكر فى أوباما وابراهيم حسن العيال النحس دول وخد بالك شوية ونظرة عطف وحنية على مدبولى وحفنى وزيزو يكونوا أساسىين وتغييراتك تكون سريعة انا ماليش دعوة شوقى اللى بيقول كده علشان انت عارفه وعارف كلامه هيديك بوست على كيفك ويهد حيلك فاهم يا جروس اه قبل ما انسى ادعوا معايا أن كهربا يربط أيده اليمين بالرباط الأحمر وانتم عارفين الباقى ياريت يفتكر .
( عمر صلاح )
صدقنى يا ابنى امك دعيالك وهيه صايمه روح يا ابنى ربنا معاك وتكون حارس الزمالك فى النهائى وسبحان الله ربنا استجاب دعوتها الفرصة جاتلك على طبق من دهب وفضة وياقوت ومرجان خد بالك اوعى تخليها على طبق ( بلاستيك ) .
( فرجانى ساسى )
كنت اتمنى تكون فى النهائى لك طعم وشكل وملك خط النص ومش هنسى وقفتك مع الفريق أمام النجم وعلى أرضهم وفى بلدك كمان ولا همك اى حاجة وكنت معاهم لحظة بلحظة من المطار والى المطار ايه الحب والإنتماء ده يا ( معلم ) ربنا يشفيك وحشتنا كتير ماكنتش اعرف ان دعوة ( رامز جلال ) هتستجيب كدة لما دعى عليك انك تغيب ٨ ماتشات الله يخرب بيتك يا رامز .
( نهضة بركان )
اوعوا تكونوا مفكرين أن احنا بننام بدرى وعاملين الماتش الساعة (١٢) بعد نص الليل وتاخدونا ( ورا مصنع الكراسي ) لا احنا صاحيين اوى اوى وعيونا ( مفنجلة ) على الاخر ولو الماتش الفجر ولا يهمكم بس شكلهم كده بتسمعوا الأخ عدلى القيعى كتير كرم الله وجهه وعرفتوا منه موضوع الساعة البيولوجية وهتدوا الزمالك ( بالخمسة ) ربنا يسترها وماتبقاش ( سبعة ) .
كل الامنيات الطيبة لموقع اخبار كوم ومزيد من الرقى والتقدم
شكرا استاذ رؤوف