رؤوف قنش يكتب : نقاط على الطريق
هذه النقاط هى نتاج لما اقوم برصده وأراه فى الشارع بمنتهى المصداقيه دون تزييف أو ملئ سطور على الفاضى وقد تكون نقاط مخزنه وقد تكون يوميه وقد تكون نقاط ايجابيه وأخرى سلبيه حسب المواقف التى تحدث .
٠ مازال بعض الشباب يمارسون هوايتهم السنويه ويستقبلون شهر رمضان بالإلتزام بالسحور قرب الفجر والإفطار عند المغرب وطبعا الإفطار فى الشارع فيما بينهما .
٠ لم اجد تفسير محدد لهذه الصوره فتاه تجدها قمه فى الإلتزام فى شهر رمضان وقد تركت الزينه والملابس المثيره وإتجهت للقبله تنوى الصلاه وعندما ينتهى شهر الأدب تكمل السنه وتعود الزينه والملابس إياها ولا تعرف للقبله طريقا وقد إتخذت من باقى الشهور شهور عسل محتاجين طبيب نفسى يشرح الظاهره دى .
٠ التسول أصبح إسلوب حياه ومهنه وقد تكون قابله للتوريث لما لها من عائد مالى كبير فى العام الماضى رأيت نفس الرجل وجدته على كرسى متحرك قعيد يلف قدمه اليسرى برباط شاش وغطاه بيتادين وقد مر عام كامل ورأيته بنفس القدم ونفس رباط الشاش والبيتادين ونفس الربطه ونفس الكرسى المتحرك والعمل متسول وعلى فكره الراجل ده بيمشى على رجله اى والله وكان بيشرب شاى فى نهار رمضان يبقى دى ايه اصل انا مش فاهم ولاعارف .
٠ محصل التذاكر أو ( الكمسرى) تابع لاتوبيس النقل العام حظيت بأننى كنت من ركاب هذا الاتوبيس ومحظوظ ايضا برؤيه هذا الكمسرى كنت متجها إلى عملى صباحا وفى لحظه قال الكمسرى وبصوت عالى جدا وكأنه يناجى ربه فى الصحراء ( يارب خدنى بقى يارب ريحنى بقى عايز اموت وارتاح من الدنيا دى وقرفها انا تعبت خلاص ناسينى ليه انا قرفت من كل البشر ) وهنا توقف وبمنتهى الصراحه الراجل ده صعب عليه قلت فى نفسى يظهر كده عنده مشكله كبيره او حاله نفسيه او ظروف عائليه اضطرته يدعى على نفسه كده ولكن إكتشفت أن كل الدعاء ده على نفسه أنه مش معاه فكه ( عشره جنيه ) لراكب كان معانا فى الأتوبيس .
٠ بنشتكى على طول من الضوضاء وأثرها على حياتنا وطبعا كلنا عارفينها ولاداعى لذكرها خشيه الملل ولكن المدهش فى إشارة المرور وكل العربيات واقفه منتظره الضوء الأخضر نجد من يخرج عن شعوره وبطريقه هستيريه مستفزه ضاغط على كلاكس العربيه بدون توقف عامل إزعاج طبعا للمريض وطالب العلم والكثير والكثير عايز بس اعرف انت لما تعمل كده هيسمعوا كلاكساتك ويقطعوا الإشارة علشان سعادتك انا بشوف سيارات الإسعاف والمطافى ليقفوا فى الاشاره ومابيعملوش اللى انت بتعمله ده أما غريبه الحكايه دى .
