كتبت:نسرين يسري
قلق بسبب غزو الذباب عليك وعلى حياتك، بيهاجمك في كل مكان في البيت وفي الشغل وفي المواصلات وفي الشارع ، وده غالبا في أي مكان في مصر مع العلم إننا في فترة تغيير فصول، الذباب بيقى كتير في فترات تغيير الفصول، لكن لإنه كتير بالشكل ده أكيد خلاك تسأل نفسك هو مثلا موسم تزاوج الدبان؟ او اختلال في التوازن البيئي؟ وبدأت تدخل في أسئلة وجودية أو تستسلم للأمر الواقع .
ولكن انتشرت أخبار من أساتذة علوم البيئة وخبراء إن الدبان اللي اتسمى بأسم الدبان “الرزل” على السوشيال ميديا ده هو أنواع دبان جديدة جايه من السودان مع الرياح الجنوبية اللي جات من السودان، وأكدوا على معلومة إنه رزل بإنهم قالوا إنه مابيتأثرش بالمبيدات الحشرية والرش وصعب يغادر المنزل أو الأماكن المقفولة.
وأكد الخبراء إن النوع ده من الدبان مش محتاج أماكن رطبة عشان يتكاثر فيها وإنه بيقدر يتكاثر في الأماكن الرطبة والجافة كمان وخصوصا كمان الأماكن اللي فيها “زبالة” لإن دي بيئته الأساسية عشان يتكاثر، ووضحوا كمان إن الدبانة الواحدة ممكن تولد حوالي 4 مليون بيضة في الأسبوع وطبعا الدبانة الواحدة قادرة إنها تنقل الأمراض لعشرات الأشخاص في مرة واحدة.
وأكد الخبراء إن الأنواع الجديدة اللي دخلت لمصر صعب التخلص منها خصوصا إن أكلات الحشرات، زي الضفادع والسحالي مش موجودة ، وحذروا من نوع جديد من الدبان موجود في اسكندرية حاليا أشبه بالبعوض واسمه دبان الخيل وهو زي الناموس شوية لإنه بيمص الدم ،بس زيادة كمان إنه بيصيب الشخص بورم.
محتاجين نفكرك بطرق مقاومة الدبان عشان زي ما بيقولوا الوقاية خير من العلاج:
1- استخدم أي دهان أو رش موجود في الصيدليات عشان يبعد عنك الدبان .
2- اغسل ايدك كويس بالمياه والصابون، عشان مايتجمعش عليها الدبان وخصوصا قبل الأكل .
3- بلاش تاكل حلويات من الشارع خصوصا لو كانت حلويات مكشوفة .
4- حاول على قد ما تقدر ماترميش زبالة في الشارع عشان الدبان بيتجمع عليها.
5- خرج الدبان من البيت أول بأول وافتح منافذ التهوية والمراوح.
6- ماتاكلش الفاكهة الغير سليمة عشان الدبان بيتلم عليها .
7- رش المبيدات عديمة الريحة عشان ماتتعبش حد من أهل البيت.
