قهوةاخبار كوم.كريم الشاذلي يروي:كيف وفقني الله للحصول علي شهادة الدكتوراه….قصة ملهمة
كيف وفقني الله للحصول علي شهادة الدكتوراه....قصة ملهمة
اليوم الثامن
ضيف القهوة اليوم الكاتب الكبير كريم الشاذلي يروي لنا
كيف وفقني الله للحصول على شهادة الدكتوراه “قصة ملهمة”
- من تسع سنين اتعاقدت على تقديم مجموعة محاضرات في دولة خليجية، وبعد ما اتعملت الدعاية، والقاعات أصبحت كاملة العدد، فوجئت بالشركة المنظمة بتطلب مني شهاداتي علشان تقدمها للجهات المختصة!
يعني ايه جهات مختصة يا مدموزيل؟! دا كان سؤال استنكاري جدا مني، نظرا لإن دي أول مرة يطلب مني طلب زي دا.
وهي كانت مهذبة جدا في شرح إن دا نظام جديد، بتتبعه الدولة علشان تعرف مين دا اللي هيتكلم في حشد جماهيري.
لكني تعاملت مع الأمر بأنفة وكبرياء شديدين مظنش اتوفر ربعهم للعقاد، وأنا بؤكد لها إن الناس اللي حجزت جاية لكريم الشاذلي اللي عرفته عن طريق كتبه ومقالاته وميهماش شهاداته.
ثم استطردت: ولعلم حضرتك أنا معنديش شهادات غير شهادة البكالريوس بتقدير مقبول وصورتي فيها مش عاطفية، فبالتالي مش هقدر أساعد حضرتك في حاجة!
المهم، قاعد ع القهوة بعد إسبوع وإذ بصديق يسألني: هو انت مش المفروض سافرت امبارح؟!
حكيت للصديق ما حدث، فرجع بضهره لورا وصرخ فيا: ليه بس مقولتليش، دا كلام، تضيع سفرية بالشيء والشويات علشان 10000 جنية!؟
هزيت راسي كناية عن عدم فهمي لجملته فتابع: 5000ماجيستر وزيهم للدكتوراه..
وقبل ما تتحول الابتسامة المرسومة على وشي لضحكة سخيفة يعرفوها عني كويس قال بسرعة: لا مش زي شهادة العيال اللي انت عارفهم بتوع الأعشاب والتنمية البشرية اللي بيجيبهوها من بره.. الشهادة سليمة ومن جامعة مصرية وعليها ختم النسر وكمان ختم أمين عام الجامعة وإمضاءه، وموثقه من وزارة الخارجية، ومن سفارة أي دولة انت عاوزها!
- قلتلي بكام؟!
- 10000جنية بس.
- هتطلع في اد ايه!؟
- عشر ايام.
- والدكتوراه؟
- لا الاتنين في عشر ايام.
- والمناقشة؟
- يا عم كريم اصحا، دي دكتوراة مهنية بعدد ساعات الحضور، ولو طالبة معاك مناقشة، أجي أناقشك هنا ع القهوة واحنا بنشرب سحلب.
شخصيا أنا بحتقر الشخص اللي بيحب يحمد على ما لم يفعل، اللي على راسه بطحة بيداريها بالتزوير، خصوصا وإني واثق من نفسي ومن إنجازي وراضي جدا عنه، وبالتالي قلت له:
- يفتح الله.
- ليه بس يا شاذلي؟
- انت عارف كويس إني خارب بيت اتنين قبل كدا بسبب شهادتهم المضروبة، منهم النصاب بتاع الأعشاب اللي مصر كلها اتكلمت عليه وكانت فضيحته بجلاجل، وبعدين أنا في عين نفسي أكبر من لقب دكتور، وكتبي أهم عندي من أي هزي كاذب.
- يا شاذلي افهم، الناس دي كانت شهاداتهم مضروبة، لكن دي شهادة حقيقية، اللي يشكك فيها يروح يشتكي الجامعة، لكن انت في السليم.
- مش هدفع فلوس أنا في ورق مزور.
- تاني مزور، طب بص، عاوزك معايا في محاضرتين في جامعة ……. جدعنة منك من غير فلوس، والشهادتين هدية مني.
- موافق على الأولى، ومش متحمس للتانية.
- يبقى اتفقنا.
وبعد اسبوعين، كنت بناقش أطروحتي الماجيستر والدكتوراة على قهوة البستان في وسط البلد، وحولي 4 أصدقاء لم يستطع أي منهم أن يحبس دموعه من الفرحة وهم يشاهدون صديقهم صاحب تقدير “مقبول” وهو ينال درجة الدكتوراة، ويمضي مختالا بها بين الناس.
بالمناسبة: القصة حقيقية بكل تفاصيلها، افتكرتها لما لقيت الشهادتين أمس في ظرفهم اللي متفتحش من يومها، فقلت أكتبها علشان محدش يقول لي يا دووووكتور تاني.
