ضيفة القهوة اليوم .الكاتبة إنجي يوسف
كراكيب حياتي.
اخطر وقت بتظهرلك كراكيب دماغك وانت داخل تنام عالسرير وتحاول ترتاح وتسترخي بعد يوم شاق ومرهق ولسه هتقول يا هادي فين المخده المريحه بتاعتك خودها في حضنك وانسي الدنيا يظهرلك فجأه شريط حياتك من اول يوم دخلت فيه المدرسه 🗣ناس كتير بتتكلم في دماغك. مواضيع كتير واخبار وقصص وحكايات وكأنك فاتح مليون محطه اذاعه في ودانك فجأه عينك تفنجل وتقوم نص قاعده وتنسد ضهرك عالسرير وتحاول تغير في المحطات تفكر في العيال ومشاكلهم ولا شغلك وارف الناس اللي بتتعامل معاها ولا اهلك اللي نصهم طلعوا اندال في اصعب مواقف حياتك وتصنف فيهم واحد ورا التاني وكأنك بترمي فاكهه معطبه من طبق فاكهه شكله جميل وهو من جوا فاسد ومالوش قيمه تقول لنفسك وبعدين انا لازم انام عشان اصحي بدري واكرر نفس اليوم بغبائه واخطائه عشان محدش بيتعلم وتوتر نفسك اكتر ودماغك تصحح والنوم يطير من عينك وتشوف كراكيب بالالوان وكراكيب ابيض واسود وتحس انك في دوامه مالهاش اخر بتفكر في الاموات قبل الاحياء وتفتكر مواقف وحكايات لدرجه انك ممكن تسمع اصوات وتحس بنفس اللي بتكلمهم تشتكيلهم من الدنيا واللي جرا فيها وتحكيلهم علي قساوه قلوب الناس وشرهم وتلاقي دموعك نزلت وحصلك حاله من الاستسلام التام تحس انك بجد مش قادر تفكر او تفتح عينك وقتها بس هتنام في عالطول. لكن هتنام نومه المتعاقب من مدرسه المواد الاجتماعيه لما كنت بتنسي ترسم خريطه مصر والسودان وتشوفك وانت بتشفها من الكتاب نام بكراكيبك اكرملك من العقاب
