حكاية صوره ازعجتنى
كتب /. رؤوف قنشانا عدت بخاف من السوشيال ميديا ومواقع التواصل الإجتماعى عالم غريب يا خال بيعملوا من الحبه قبه ومن الواقع خيال والعكس والكدب حقيقه والعكس ويزيفوا الأخبار والعكس يضعوا صورة رجل على جسم إمرأه والعكس وانت بقى تحكم عقلك اذا كان خلوا لنا عقل كل يوم تشوف حاجه جديده اخبار تلاقى صور تلاقى ابداعات وخرافات تلاقى موسوعه ياجماعه تاخد منها اللى انت عايزه وتردد كمان
وممكن كمان تنقل الإشاعات وكمان ممكن تكون مش مصدقها بس تلاقى نفسك بتنقلها وزى ما الكتاب بيقول بس تعالوا نتفق القليل منا اللى بيحكم عقله لما يشوف صور او يقرأ خبر مايعرفش جاى منين يقوم يهدى على نفسه علشان ماينقلش لحبايبه اخبار وصور غلط ويمكن تحدد مصير وتخرب بيوت عمرانه وممكن تعمل فتنه وتشعل حرب كانت نايمه والعقل له عامل مهم واساسى فى الأمر ده لأنه فى لحظه يقولك اقف عندك أهدى شويه اصبر ربنا يهديك رايح فين والعيب بقى اننا فى النقل نقل الصور والأخبار والنكت زى النار وفى التلقيح معانا شهادة الدكتوراه بدرجة ممتاز مع مرتبة الشرف قطن وسفنج .
على الناحيه الايجابيه والجانب المضيئ المليان شباب وحيويه وطاقه كنت يتفرج على ماتش الكونغو ومدغشقر فى بطولة إفريقيا على أرض مصر المهم جات اللقطه على رئيس الاتحاد الأفريقى احمد احمد وطبعا انا عارف شكله ولقيت جنبه ولد شاب وشه مايل للسمره شبهنا كده خليط بين الصعيدى والقاهرى قلت ممكن يكون ابن أو اخ او قريب رئيس الاتحاد وفجأه لقيت المذيع بيقول هذا هو السيد الرئيس رئيس دولة مدغشقر السيد ( أندريه راجولينا ) انا والله استغربت وكمان ضربت كف على كف.
ده رئيس دوله معقول وفى السن ده هوه فيه ايه بالضبط وكان مع كل كوره لفريق بلده وهدف تلاقيه يقوم من على الكرسى ويتنطط ويصقف لاتقولى بقى وقار والهيبه والهيلمان كل ده هيضيع هرد عليك واقولك الراجل ده شباب ومن حقه يتنطط حتى لو رئيس بلد وايه يعنى ولقيت المذيع بيقول عنده رئيس الدوله عنده بس ٣٩ سنه ومحبوب جدا من شعبه لقطة الرئيس وكلام المذيع خلانى ادخل على النت وابحث عن المكتوب عن الشاب ده وقرأت ولقيت ان نسبه نجاحه علشان يوصل للكرسى ٩٨٪ تخيلوا النسبه دى كبيره اوى ولقيته مظبط شعبه على الأخر ومدلعهم النت فى كل بيت ببلاش الرقابه على الأسواق والتجار من حديد والسلع متوفره .
واللى يفرس وخلانى أعض على شفايفى من الغيظ لحد ما كنت هقطعهم أن المواصلات العامه ببلاش ايوه ببلاش ومتوفره فى اى وقت واى مسافه واى مكان تخيلوا المواصلات ببلاش وانا علشان اروح شغلى ادفع بس مواصلات ٢٠ جنيه رايح جاى على رأى عادل امام ( ياحزن الحزن )
الأخ أندريه راجولينا هوه اللى على يمين الصوره شوفوا الشباب واليقظه والتفكير ازاى ينهض لبلده ويخليهم يركبوا المواصلات العامه ببلاش انا النقطه دى تعبانى وعملالى مشكله من ساعة ما قرأتها وياريت ماشوفته
وكان يشجع بلده من بيته فى التليفزيون مش كان احسن خليتنا نفتش عنك وتكون حديث الناس كلها بس بجد انا مبسوط علشان شاب زى ده يقود بلد حتى لو جزيره يقود يأمر يصلح ما أتلفه الأخرين من العجزه وكبار السن ده المستقبل والمستقبل للشباب والمفروض فى كل دوله ومنهم مصر أن تستعين بالشباب وتحترم فكرهم وتسخر طاقتهم علشان ننهض محتاجين فرص محتاجين نشتغل ونقود فى أماكن مهمه ده حقنا ومش عيب أصغر وزير عندنا شوفوا عمره كام طبعا الخبره .
مهمه بس الشباب مهم واهم أما الراجل اللى موجود على شمال الصوره اللى منورنا انا مش هتكلم كتير عنه انتم مش ناقصين ده بقى ( عضو لجنة الشباب فى مجلس النواب ) اكتفى بهذا القدر وسعيكم مشكور والبقاء والدوام لله .
