اليوم الثامن
تلغراف الى
** شبان بدواى
اقول ايه واعيد ايه مافيش كلام اقدر اقوله يوفى حقكم بالجهد والعرق والإنتماء كان الصعود للممتاز ( ب ) واللعب مع كبار القوم وأصبح إسم بدواى دلوقتى علامة مسجلة وبقت بدواى على الخريطة الكرويه صوتها عالى ومن قدكم والله حقكم تفرحوا حقكم مين مش لوحدكم لا حقنا كلنا نفرح ونقدم التهانى بالصعود الغالى قد ايه الفرحة حلوه ومتابع كل البوستات ومشاركة الجمهور من هنا وهناك الكل مبسوط فرحان وعشمانين وطمعانين بعد الصعود للممتاز ب أن الفريق يتصدر ويصعد للممتاز وتقابلوا الكبار اوى ولاعبتكم العين هتبقى عليهم الأهلى يشاكس من هنا الزمالك يناطح من هناك والفايدة هتعم على الشبان والإقتصاد هيرتفع والكشافين هينورا والدنيا اكيد هتبقى حلوه محتاجين لعيبه على قد المسئوليه مش اى لاعب وخلاص ماعدش ينفع مجاملات ولا غيره مرحله مهمه مرحله كبيره الكل لازم يتكاتف وتبقوا على قلب رجل واحد والف مليون مبروك .
** رمضان التغلب
آه منك ياتعلب ده مداعبه اوعى تزعل اليوم يومك والليله ليلتك مين قدك دلوقتى اكيد مافيش الفرحة والسعادة ماليين عنيك والكل دلوقتى بيقولك شبيك لبيك شبان بدواى بين إيديك رئيس مجلس إدارة نادى شبان بدواى فرحت كل بدواى اسمك يا عم ( تعلب ) على كل لسان بالصمود والتحدى كسبت الرهان وبالجهد والعمل هتلعب ممتاز ( ب ) مين يصدق انا لحد دلوقتى مش مصدق بس اللى انا مصدقه أن معاك كتيبه من المخلصين المحبين لبلدهم وعارفين قيمه تراب بلدهم علشان كده ربنا كان معاكم وماضيعش تعبكم وهتبقوا فى مكانة افضل بكتير والأيام جايه جايه الصبر مفتاح الفرج ونصيحه منى حاول لو عندك ( طابور خامس ) أقضى عليه انت مش محتاج لشوية منتفعين ولاكدابين زفه .
** خالد العقده
دورك الإعلامى مميز مافيش شك وإحساسك بالمكان اذا كان ضاف لك فأكيد انت ضيفت له الكتير بنعرف منك كل جديد ( وهكذا ) مش كده ولا ايه المرحله اللى فات كوم والمرحلة اللى جايه كوم تانى خالص معلش انا بجيب من الأخر مابعرفش اذوق الكلام شوف بقى ياعم خالد لازم مع الفترة الجديده اللى جايه دى يبقى لك مركز إعلامى مختلف ( ستوديو ) تحليل على أعلى مستوى ومجموعة من الكاميرات ومصورين وتجيب ناس تحلل فى كرة القدم وتعمل بث مباشر من ارض الحدث وتختار مراسلين بنفسك ، إختبار وابعد عن المجاملات واختار اللى يقدر يشيل معاك المسئوليه انتم دلوقتى فى مرحلة بناء محتاجه المخلصين جدا حتى المخلصين نص ونص ماينفعش واللى يزعل يقعد فى بيته فريق شبان بدواى دلوقتى بقى حاجه تانيه خالص طبعا محتاج قماشه تانيه خالص واكيد ( الترزى الإعلامي ) اللى يقدر يفصل موجود هوه انت يانجم بالتوفيق كابتن خالد وهكذا .
