تلغراف إلي…دورى مستقبل وطن
الله على إختيار الإسم حاجة كده مشرفة أوى تدعوك للتفاؤل وجبر الخواطر والمستقبل إلى هياخدنا فى أحضانه وهنغنى كلنا ( صورة كلنا كده عايزين صورة ) مركز شباب الخيارية هيعمل دورى بالإسم ده ( دورى مستقبل وطن ) تخيلوا !!!! أنا شايف انها مناسبة كويسة جدا ومحفل كبير على أرض الخيارية علشان الناس كلها تسمع وتشوف الأخ هانى رزق ( الرئيس الهمام ) وهوه بيسدد الديون اللى عليه وبأعلى صوت هيشكر فى الحزب أيوه الحزب وإن كان عاجب ، ويقول فيه وفى قياداته أشعار ويعمل فيها عنترة بن شداد ،
وطبعا البانر أقصد البانرات وصور القيادات وأسمائهم هتبقى منورة الدنيا وطبعا متكلفة وهيقنع الناس ويقول لهم الحزب هوه اللى عامل كل ده ، ويمكن كمان يغنى أصله صوته حلو وبيعرف يغنى وبيقنع وهيخلى الناس تصقف له وأهو يبقى الحمد لله كسبنا عندليب جديد ، كان لازم تعمل الدورى ده علشان ( عينك فيها مشكلة ) ومش هتقدر تقول لأ من أمتى مركز الشباب بيتلعب على أرضه دورى بيحمل إسم حزب بقياداته وأعضاؤه وأوعى تقولى دى مصلحة عامة والكلام المستهلك ده ،
حزب مستقبل وطن مايعرفش أى حد ما يعرفش إلا إنت يبقى هيخدمك إنت ومصلحتك إنت وعايز الناس كلها تشاور عليك إنت ، خدعت الجمعية العمومية وبتعمل لنفسك نفوذ وقوة على حسابهم وبتدعوا الأحزاب على أرضهم ، ياريت تقولى إشمعنا ( مستقبل وطن ) حتى لو إنت عضو فيه جاملهم على حسابك ومن رصيدك قابلهم فى بيتك أو على مركب على النيل أو على كافيه ، لو كان عملها رئيس تانى غيرك كنت إنت هاجمته وفضحته وطلعت عينه إنما منك تبقى تمام ومش عيب ومباح ، وياترى مين هيكون راعى الدورة ويرمى فلوسه اللى فيه ناس كتير فى اشد الحاجة للفلوس دى ، ليه يا أخ هانى أفندى مابتعملش دورى مثلا بإسم دورى ( حزب السلفيين ) مش ده حزب ولا أنا مش واخد بالى ونشوف رد فعل الناس ايه ، بتسدد فواتيرك على حساب غيرك .
** الجمعية العمومية
ماينفعش إسم حزب يتعمل له دورى بإسمه على أرضكم مش كل حاجة يعملها رئيس مجلس الإدارة تبقى قرآن وفرض ولازم ، المشكلة مش عنده انا عارف ان ده دين عليه ولازم يسدده إنما إنتم فين من إللى بيحصل ده والله ربنا هيحاسبكم على السلبيه والقهر إلى إنتم فيه ده ، وقولت قبل كده إن مركز الشباب بقى مرتع وتكية وفعلا ليتحقق كلامى يوم بعد يوم ، وسبحان الله مافيش أى عضو فى مجلس الإدارة إعترض على الدورة دى ويطلع يشجب ويستنكر أو حاول يقدم استقالته أكرم له ويمشى مرفوع الراس ويكون عنده الشجاعة ويطلع يقول للجمعية العمومية اللى قعده وقعد زمايله على الكراسى إن اللى بيحصل ده غلط وماينفعش وتسجلوا موقف حتى نحترمكم ،
بس يمكن اكون ظالمهم ويكون ماعندهمش خبر بالدورة دى وتتفاجئوا زينا كده ، بكرة يبقى مركز شباب الخيارية مع الأيام والليالي يبقى اسمه مركز شباب مستقبل وطن وخد عندك بقى ندوات كل يوم والتانى ، وكمان دورات تثقيفية للشباب وحث الوطنية فيهم لأنهم بلا وطنية ، وبانرات على سور المركز دعاية للحزب ، ورجل داخلة ورجل خارجة ، وفود طالعة ووفود نازلة الخ الخ … إفتكروا كلامى ولازم أكتب التاريخ ٤-٩-٢٠١٩ ، الدورة هى ضربة البداية ومش هتكون النهاية .
