الشاعر المصري أحمد إبراهيم النجار يكتب قصيدة “اوعديني”

اليوم الثامن

القاهرة/ 2/11/2019
اوعديني

لما تقري ف يوم كتابي
كل صفحه وكل سطر
كل كلمه وكل حرف
هتعرفيني
اني عايش بين اهاتي
وبين عذابي
بين حضوري
وبين غيابي
وسط صفحه ملغبطه
فيها رحله
ع المدي متشغبطه
كل حلم حلمته ليكي
ف يوم انا
مالهوش صدي
صوتي اصبح ع المدي
حبة كلام مالهوش معاني
فوق سطور متشعبطه
وكأني واقع جوة بير
او حتي عايش
جوة كهف وفيه اسير
او تحت بحر وجوة حوت
او جوة قبر ف وسط موت
والليل سكوت
كاسي العيون رحلة ضباب
واللون سواد معجون رماد
متلونه كل الحاجات
مالهاش جمال
غير بس لون الجرح
مكسي بالسواد
او حبة من بسمة اهات
جوة العيون يجري السؤال
مين اللي عاشق لون عيونك
وقولي مين لعنيكي خان
اوعديني
لما تقري ف يوم كتابي
كل صفحه وكل سطر
كل كلمه وكل حرف
هتعرفيني
اني عايش بين اهاتي
اوعديني اوعديني
تقري لما اكون رفات
تفتكري اني
كنت واحد ليكي عاش
لكن خلاص تحت التراب
واللي باقي سطور كتاب
حبة حروف
اوعديني اوعديني
بقلم الشاعر المصري
أحمد إبراهيم النجار