مشاهير اليوم الثامن الفنانة “ميمي جمال” تروي تاريخها الفني

كتب:طارق السويسي

اعتزلت الفنانة القديرة ميمي جمال،الفن منذ عدة سنوات ،لكنها ظهرت مؤخرابعد غياب طويل عن الفن و اتخاذها قرار نهائى بالاعتزال كان هذا اللقاء مع الفنانة الكبيرة ميمي جمال .

بسؤالها عن بداية دخولها عالم الفن قالت:
” أنا من مواليد جزيرة بدران بشبرا ودرست فى مدرسة فرنساوى وكانت زميلتى فى الفصل بنت الأستاذ عبدالله بركات وكان مساعد للمخرج الكبير عز الدين ذو الفقار وكان بيدور على بنت جديدة تمثل وتنفع لدور جاد فى فيلم “أقوى من الحب” عام 1953 وزميلتى قالت لوالدها إن فيه بنت فى فصلها بتقلد وتمثل، فطلبنى أروح أقابل الأستاذ عز الدين”.
كما تحدثت الفنانة الكبيرة ميمى جمال عن أول مرة تقف أمام الكاميرا وأمام هؤلاء الفنانين العمالقة الذين شاركتهم الفيلم فقالت :”أول مرة طبعا اتخضيت لأنى كنت واقفة قدام مديحة يسرى وعماد حمدى وشادية، صحيح كنت فرحانة لكن أول ما دخلت البلاتوه خفت وحسيت برهبة وأنا داخلة على الفنانة الكبيرة مديحة يسرى وكانت تقوم بدور والدتى وكنت بترعش، واستاذ عز الدين ذو الفقار قال لى: ده مشهد مهم، فقلت له أنا مذاكرة وحافظة الكلام، فقال: مش مهم الكلام المهم تدخلى مش بتترعشى”.
وتابعت الفنانة الكبيرة وهى تضحك عندما تذكرت هذا الموقف:” قلت له طيب أعمل بروفة، فقال ورينى، و فى البروفة كنت وحشة أوى، قامت مديحة يسرى نادتنى وأخدتنى على رجلها وقالت لى انتى بنتى وخايفة عليا، فقلت لها أه أنا جاية علشان أقولك زعلانة ليه بابا ساب البيت ومشى وانتى السبب وانتى هتضربينى بالقلم وأنا خايفة قالتلى متخافيش وفعلا عملت المشهد وخدت القلم وعيطت وجريت ، وبعدها شاركت فى فيلم مع الفنان كمال الشناوى وزهرة العلا.
واكملت الفنانة الكبيرة ميمى جمال وهى تتذكر بدايات المشوار :” بعد ما كبرت شوية شاركت الفنان الكبير كمال الشناوى فى مسرحية فى الكويت وكان وقتها متزوج من الفنانة ناهد شريف واحنا فى الطيارة نادانى وقاللى عارفة لو جيتى قدام مدام ناهد وقولتيلى فاكر يا استاذ كمال لما مثلت معاك وأنا صغيرة مش هيحصل لك طيب، إياك تقولى إنك اشتغلتى معايا وانتى طفلة وإنى مثلت دور أبوكى، أنا مش عايز المنظر ده فقلت له: طبعا ياأستاذ مش هقول”.
وتابعت ضاحكة :” نظموا حفلة بعد المسرحية والاستاذ كمال كان بيقول كلمة فقال ميمى دى اشتغلت معايا وهى صغيرة، فقلت له مش انت يا أستاذ قلت لى متقوليش” .

وبسؤالها عن زواجها من الفنان حسن مصطفى اجابت:

وبحب شديد امتزج بحزن كبير تحدثت الفنانة الكبيرة ميمى جمال عن تفاصيل رحلة العمر والحب مع شريك حياتها الفنان الكبير الراحل حسن مصطفى.
وقالت النجمة الكبيرة :”عرفنا بعض وتزوجنا فى فرق التلفزيون، كان متزوج قبلى من أم ابنته الكبرى سمية ولم يستمر معها، وكنا نتحدث كثيراً ولفت نظرى بطيبة قلبه، وصرح لى بحبه وطلبنى للزواج ووافقت، وتزوجنا عام 1966 يوم عيد ميلاده 26 يونيو”.
وتابعت الفنانة القديرة “ميمي جمال” بحزن قائلة :” مش عارفة أقول المرحوم لسه حاسة إنه موجود فى البيت كان بالنسبة لى أب و أخ وزميل وصديق وحبيب وزوج وكل حاجة فى حياتى، كنت معتمدة ومسنودة عليه وكان عارف عنى كل حاجة وبعتمد عليه فى كل شيئ”.
وتابعت:”أنجبنا توأمنا نجلاء ونورا، ووالدتى وجدتى اهتموا بولادى و لولاهم مكنتش اشتغلت، وعشت أنا وحسن فى البيت والشغل مع بعض فى كل حاجة أكثر من 40 سنة ، وكان نعم الزوج والأب، طيب وحنون جدا”.

كما اوضحت الفنانة الكبيرة خلال الحوار تفاصيل الحياة داخل منزل حضرة الناظر الفنان حسن مصطفى والذى كان موجهاً بوزارة التربية والتعليم ووصل لمنصب وكيل وزارة .
وقالت الفنانة الكبيرة ميمى جمال : لما جوزى مرض وتوفى حسيت فى لحظة إنى توهت، كأنى قاعدة على كرسى ومرتاحة وفجأة حد شد ضهر الكرسى فبقيت فى الهوا”.
وارتجف صوتها وهى تتحدث عن شريك حياتها وحب عمرها :
هو الراجل الوحيد فى حياتى، متجوزين من سنة 66، كان ليا الأخ والأب والزوج والحبيب والسند، وشايل عنى مسئولية كل حاجة وعارف عنى كل حاجة، كنا نبص لبعض كل واحد يفهم التانى عاوز يقول ايه، عشرة طويلة وفجأة راح ولما ملقتهوش تعبت نفسياً وحسيت بزلزال هزنى ومقدرتش أشتغل”.

قرار الاعتزال :

كما تحدثت الفنانة ميمي جمال ،عن التغير الذى أصابها بعد وفاة زوجها الفنان حسن مصطفى قائلة:”بعد وفاة حسن بفترة بعتلى الأستاذ أحمد الإبيارى مسرحية وقال لى إخرجى من أحزانك واشتغلى، المسرحية كانت كوميدية ولما حضرت البروفة لقيت جوايا حزن ومفيش ضحك مقدرتش أطلع الضحكة، وحسيت إنى مش هقدر أخدم البطل اللى معايا وأسنده زى ما سمير غانم الله يرحمه كان دايماً يقول ميمى دى العمود اللى واقف قدامى”.
وبحزن وانكسار قالت :” حسيت إنى مش قادرة أسند حد، وإنى تعبانة ومش لاقية السند اللى كان بيقوينى فرجعت العربون واعتذرت، وبعد فترة اتعرض عليا فيلم لف ودوران 2016 مع أحمد حلمى، ولقيته فيلم خفيف ودورى أم ومش كوميدى أوى والفيلم فيه سفر فقلت أحاول أخرج من أحزانى، وبعد الفيلم الدنيا قفلت معايا وقعدت 5 سنين مشتغلتش، حسيت إن تعب السنين حل عليا وإنى مدتش ولادى وحفادى حقهم لأنى كنت طول الوقت بشتغل، ووالدتى هى اللى اهتمت بولادى، فقلت كفاية أعيش مع ولادى وأحفادى الشوية اللى فاضلين”.

الفنان أحمد زكى :

و قالت الفنانة ميمي جمال انها اشتغلت مع كبار النجوم ومع كل نجوم الكوميديا مارى منيب وعبدالمنعم مدبولى وفؤاد المهندس وعادل إمام وسمير غانم ومحمد نجم وحسن عابدين ومحمد عوض وأمين الهنيدى وغيرهم الكثير و لكنها كشفت موقف جمعها بالفنان أحمد زكى وقالت عملت معه فى مسرحية مدرسة المشاغبين لمدة شهر فى الفترة التى سافرت فيها الفنانة سهير البابلى لإجراء جراحة فى عينها بالخارج …فكنت اعرف بداياته، ومرت سنوات حتى اشتركنا فى فيلم معالى الوزير، وفى الفيلم كان كبر وبقى أحمد زكى النجم الكبير ومكنتش عارفة هل تغير أم لا وقلت أشوف رد فعله عندما يقابلنى، وخفت أروح مباشرة اسلم عليه”… فقلت له مساء الخير من بعيد وانتظرت رد فعله فوجدته يقابلنى بترحاب وحب ومودة كما كنت أعرفه، ولما قلت له إنى مكنتش عارفة هتقابلنى إزاى، قاللى إحنا عشرة وانتى مرات أستاذنا الكبير حضرة الناظر، وكان فى منتهى الود والحب”.
و فى نهاية الحوار قامت الصحفية زينب عبد الله من جريدة اليوم السابع يإهدائها درع تكريم وباقة ورد تقديراً لمشوارها الفنى الطويل الذى بدأ عام 1953 و بلغت اعمالها اكثر من 490 عملا فنيا .