تلغراف الى
المنتخب الجزائرى
الف مبروك الفوز بكأس افريقيا فريق عربى نفرح له وتستحقوا البطوله عندكم إصرار وتحدى وعينكم على الكأس علشان تفرحوا جمهوركم اللى كان عنده ثقه فيكم وحاسيين انكم ابطال وعلى المنصه ناويين ومرماكم طول البطوله نظيف وحارس مرماكم احسن حارس فى البطوله وعجبنى مشهد السجود لربنا وتشكروه على فضله بالتوفيق كانت لقطه فى قمه الروعه والخشوع وخلتنى اتعاطف معاكم اوى اوى وكمان الجمهور كان مبسوط من اللقطه دى فرحتكم بالكأس ما ناستكوش فضل ربنا عليكم أنه فرحكم فكان الرد بالسجود الله عليكم .
رياض محرز
من حقك تفرح بالبطوله تجرى بالكاس وتتنطط وتهزر مع زمايلك وتضحك مع جمهورك واحنا تعاطفنا معاك طول البطوله واسمك بقى على كل لسان والكل بيقول محرز محرز والصراحه انت لعيب كبير وكنت فارق اوى مع منتخبك وكان لك دور كبير فى حصول بلدك على الكأس بس مش من حقك انك تكون ( قليل الذوق والأدب ) على الأرض المصريه اللى شجعتك ولعبت وتألقت على ارضها لما تتعمد انك ما تمدش ايدك علشان تسلم على رئيس الوزراء المصرى ووزير الشباب والرياضه وهما واقفين فى الصف بجوار رئيسك يبقى كده انت لاعب كوره بس بدون اخلاق وفاقد الأدب ومكانك الطبيعى…. ولا بلاش اللاعب لازم يكون اخلاق ومتربى إنما اللى شوفته منك تبقى حاجه تانيه .
جمال بالماضى
مدير فنى صغير فى السن وحصلت على كأس إفريقيا وانت فى السن ده يعنى كبير كمدرب ولكن صغير فى تصريحاته وكلامك وفعلا انت عايز تتعرض على طبيب الرمد علشان يفحص نظرك وتعمل مقاس نضاره يمكن تشوف صح بعد كده وتعرف تتكلم وتحسس على كلامك قبل ما تقوله مش تهرتل وتقول اى كلام وتدعى أن مافيش جمهور من مصر ساندك وساعدك وفرضا يا نجم انت ماشوفتش مشجعين مصريين فى المدرجات ماتابعتش مواقع التواصل الإجتماعي ومعظم المصريين بيتمنوا فوز المنتخب الجزائرى بالبطوله وهما بيقولوا يارب ليه دايما تقول الوحش وتعمل علامه سوده فى تصريحاتك وتخلى الجمهور يبقى بينهم وبين بعض سوء تفاهم يبقى فعلا من حق رياض محرز ما يسلمش على رئيس الوزراء وكمان وزير الشباب والرياضه لأنك اكيد عبيته كره وان مافيش ولا مصرى شجع الجزائر فكان رده فعل محرز أنه يكون قليل الأدب زيك كده وماتعرفوش فى الأصول اى شيئ ياريت ترجع لتصريحاتك وشوف نفسك يمكن ترجع لصوابك وتعتذر على اللى قولته يمكن يغير منك محرز ويقدم اعتذار وماتخليش فرحتك تنسى أن دى مصر ودى جمهورها واذا كان معاك ١٥ مليون فمش عايز اقولك احنا عندنا كام مليون وكمان وبطوله افريقيا عندك بطولتين مش عايز اقولك مصر عندها كام بطوله ماكنتش اعرف ان الغل يعمل فيك كده ويخليك صغير بالشكل ده .
