اليوم الثامن
تلغراف الى
** الأهلى
كنت كتبت مقاله وأنتم منورين فى ( المركز الأخير ) وأيامها فرح جمهور الزمالك اوى وهيص بوجودكم فى جدول الترتيب بالشكل ده وعملوا تحفيل كبير ومن ضمن الدعابات الزمالكاويه قالوا ( لا لهبوط الأهلى ) ( الماتش النهارده الساعة صنداونز ) اشاره لهزيمة الأهلى بالخمسة وأيامها الأسلوب كان فيه تهكم وسخريه كبيره اوى وماكانوش يعرفوا أن الأهلى لعب ماتشات اقل من الزمالك كان فرق يعنى ٥ ماتشات ومستوى الأهلى كان سيئ جدا والفريق اللى كان عايز نقط كان نفسه يلاعب الأهلى علشان يكسبه وكتبت فى المقاله أن الأهلى سيعود وبقوه وسينافس لأخر دقيقه ونفسه طويل ومركزهم فى الجدول مؤقت وكتبت سؤال ماذا لو فاز الأهلى ببطولة الدورى ؟ وماهو ردة فعل الجمهور الزمالكاوى ؟ ياريت الاقى إجابه منهم دلوقتى بعيد بقى عن العوامل والمداخل والمخارج والقطايف والقطايف زى شماعة الحكام ولجنة المسابقات .
** الزمالك
( الزمالك فريق طيب ) وفعلا طلع طيب اوى وابن حلال مصفى وكريم اوى وقلبه ابيض زى الفل ومش بيحب يزعل اى حد خالص وميزته أنه ثابت على مبدئه ومستمر وهيستمر وبقى علامة مسجله ( اسلوب حياة ) والمركز الثانى بقى زى شعار النادى الموجود على علمه وعلى فانلات اللعيبه من الناحيه ( الشمال ) على قلب كل لاعب بس يظهر كده والله اعلم أن اللعيبه دى ما عندهمش قلب ودمهم زى لون فانلاتهم المهم جمهور الزمالك مش بيزعل اوى لأنه صدر للعيبه دى أن المركز التانى عادى ولايهمكم الأهم ايه بقى يقولوا بنشجع ( اللعبه الحلوه ) مش مهم الدورى بس الأهم نشوف لعيبتنا وهما بيلعبوا وحشونا بالذمه ده كلام عرفتوا ليه دلوقتى احنا لسه دوله ناميه ومن العالم الثالث علشان الثبات على المبدأ وعدم التطوير وبنخاف من كل جديد والجديد لو الزمالك خد الدورى وهوه فى الحاله الطيبه دى اه ونسيت اقول طالما أن الجمهور طيب ومش بيزعل انا هفكر اروح العب معاهم ونحافظ على المركز التانى وانا راضى بأى مبلغ مش هبقى طماع.
** حسام عاشور
تخيلوا اللاعب ده خاد لوحده بس ١٢ دورى وفريق منافس وكبير فى بلده خاد نفس العدد يعنى لاعب يوزن فريق بحاله ومن حقه يقول أنا زيى زيك انت خدت ١٢ وانا خدت زيهم ياريت جمهور الزمالك مايزعلش منى ومن كلامى وان كان قاسى بس هيه دى الحقيقه المره وحسام عاشور مش كداب لأنه فعلا خادم الدورى ١٢ مره ومش هتكلم الا فى الحقيقه ولازم تعرف فين مشكلتك علشان تعرف تحلها وبلاش تحافظ على مركزك بالشكل ده وتبقى روتينى الجمهور هوه اللى بيشيل الليله اللعيبه بتسهر وتاخد ملايين واحنا اللى بنشيل ( الطين ) ونفس الجمهور ده هوه اللى دفع اللعيبه دى أن البطولات مش مهم الأهم نشوفكم بخير وبصحه جيده وبقول اهو وبحذر من دلوقتى علشان ماتقولوش رؤوف ماقالش ولا لفت نظرنا لو حسام عاشور خاد الدورى السنه الجايه هتبقى البطوله ( ١٣ ) ساعتها ماحدش يزعل ويتقمص لو الدوله عملت نادى بإسم حسام عاشور وينافس الأهلى ساعتها بقى الزمالك هينافس على المركزالتالت وهتضروا رجليكم على الأرض وتحطوا إيديكم على راسكم وتقولوا فى صوت واحد ( ياحزن الحزن )
