تلغرافيات اليوم الثامن
تلغراف الى
يكتبها:روؤف قنش
فريق الخيارية
طبعا حاجة مشرفة جدا وتدعو للفخر أن فريق الكورة بمركز الشباب هيلعب فى الدورى الدرجة الرابعة مش مهم حتى لو هيلعبوا درجة عاشره المهم أنه فى الدورى وكمان اتعاقدوا مع مدير فنى جديد كان مع فريق العمال وطبعا استغنوا عنه ما أعرفش ليه بس المهم لما الفريق الأول يلعب فى الدورة الخارجية وعلى ارضك وبين جمهورك وقدام مدرب جديد جاى يتابعكم ويشوف مستوى الفريق لأول مره يكون الشكل ( اللى مش ولا بد ده ) وشكل اللعيبة وهما لابسين الفانلات الصراحة مش مريح ولايدعوا للفخر لكن يدعو للدهشة انتم بتصرفوا ماشاء الله على العزومات واكل مالذ وطاب وكمان بتعملوا حفلات وبتاخدوا تبرعات من هنا وهناك واكيد هتعملوا فطار مجمع هيتكلف شيئ وشويات طيب يا جماعة خلوا الشكل حلو وهاتوا فانلات .
فريق قولنجيل
انتم فريق كبير وبتعملوا للدورات الخارجية شكل محترم اوى والصراحة بيعجبنى نظامكم إداريا وتنظيميا حتى اللعيبة داخل الملعب حاجة محترمة اوى وزى الفل وقول عن كده زى ما انت عايز تقول قول مش زى بعض الفرق فانلة من هنا وشورت من هناك وياخوفى ليلعبوا بعد كده بالبيجامات تبقى مصيبة اللى عايز اقولة كل دورة خارجية تلعبوا فيها يبقى لصاحب الأرض الشرف انكم بتلعبوا على أرضهم ومكسب كبير لهم والجيات افضل اكيد ومع قولنجيل مافيش مستحيل .
احمد حمزة
كل عام وحضرتك طيب يا ( برنس ) ورمضان كريم وعليك سعيد ودايما صحتك تبقى زى الحديد اللى كان بيعجبنى فيك وحضرتك رئيس مجلس إدارة مركز شباب الخيارية ارسيت مبادئ وقوانين والكل كان بيلتزم بها ومايعديش حدوده حتى لو كان مين وحتى غرفة الإدارة مش اى حد كان بيدخلها والمنصة مش اى حد يقعد عليها ولاتسمع للغوغائيين ناشرى السموم والكلام الفارغ حبيت اشكرك بس واقولك رمضان كريم ياحاج احمد وعلشان ماحدش يفهمنى غلط انا بقدم التهنئة للراجل البرنس ده بمناسبة شهر رمضان الكريم .
كدبة ابريل
كنت عايز اقول ايه كنت عايز اقول ايه اه افتكرت مش اى حد ياجماعة يمسك موبايل فى ايده ويصور بيه عمال على بطال ويقعد يطنطط وكلام من ده يبقى نقول عليه متحدث اعلامى ومتحدث رسمى ومش عارف ايه من المسميات الجديده دى ويعمل فيها اعلامى ويصدق نفسه وده طبعا كارثة علشان لما بيصدق نفسه بيتهور ولما بيتهور بيغلط ويقول اى كلام وقبل ما بيسيئ لغيره بيسيئ لنفسه الأول علشان راح فى (حته) مش بتاعته خالص .
