إنجي يوسف تكتب :ياوارث هورثك
خلافات وعداءات وقطع صله رحم ومشاكل لاحصر لها بسبب الورث اكيد كلنا صادفنا الشخص المتسلط اللي شهوه المال عمت بصيرته وسيطرت عليه لدرجه انه شايف كل شيء حواليه مادي. بيتكلم بالفلوس وبس. فاكر انه هيخلد وهيملك الملك معتقد ان فلوسه زي ما نفعته في الدنيا. الماديه. هتنفعه في اخرته. فلوسك ممكن تقرب ليك ناس مزيفين في الدنيا هتسمع الكلمه الحلوه. هتتفتحلك ابواب مقفوله. هيصاحبك اصحاب المصالح. هتتخدم بفلوسك. هتكسب مظهر اجتماعي. لكن عمرك ما هتكسب حب الناس فلوسك مش هتكون معاك وانت بتتغسل وتتكفن زيك زي ابسط عبد من عباد الله. الناس اللي كنت السبب في عدائها وقطعت صله رحم عشان تحافظ علي شويه ملاليم في نظرهم. هما اول ناس هيورثوك كل ممتلكاتك اللي بتحبها وتخاف عليها هتكون ملك ليهم كل مقتنياتك اللي اشترتها بعنايه وحافظت عليها اكتر من اهلك. هتكون تحت تصرفهم. مش هيكون ليك شيء تاخده معاك غير عملك. للاسف محدش عايز يتعظ من اللي سبقونا نزلناهم بأيدينا وقفلنا عليهم تربه وهما لاحول ليهم ولا قوه نفسهم يصرخوا وينادوا علي اللي ينقذهم من هول الموقف. لكن خلاص. اللي عاديته هيسيبك للضلمه والحساب وهيقعد نفس مكانك وفجأه هتتحول كل مقتنياتك واملاكك واموالك اللي عشت عمرك تتباهي بيها في إيد اكتر شخص ما توقعتش انه يقولك يا وارث هورثك
