تلغرافيات اليوم الثامن ….يكتبها اليوم :رؤوف قنش

اليوم الثامن

تلغراف الي

عمرو ورده

تعالوا نسأل نفسنا ليه اللاعب ده تحرش بعارضة ازياء بدون تحمل مسئوليه وعدم احترام تيشيرت المنتخب ولاعلم بلاده والاجابه سهله جدا لأنه عارف ان فيه تسيب ومافيش رقابه واللى عايز يعمل حاجه يعملها وحتى لو المسئولين عرفوا وايه يعنى هيمشونى هعرف ارجع ومن أمن العقاب أساء الأدب مش هتمشى معايا وطبعا ربنا يخلي صلاح اتوسط وعمل قاعدة وصفى الليله وورده لازم يرجع ايوه لازم يرجع ورئيس اتحاد الكوره امرك يا ابو صلاح احنا نقدر نكسر لك كلمه ورده يرجع ولو عايز يلعب الماتش الجاى يلعب احنا نقدر نزعلك انت الغالى وبجد يعنى علشان خسرتوا المبادئ والقيم معاها هتخسروا البطوله وعلى ارضكم وكفايه عليكم كسبتم رضا ابو صلاح والتحرش .

** محمد صلاح

سعيك وحرصك انك ترفع الايقاف عن زميلك ورده وانك تكون حريص أنه يلعب تانى بجد سقطه كبيره فى تاريخك شوفتك بتعمل اعلانات تحارب المخدرات وتناهض التدخين وحريص على صحة الشباب ومع كل كده تدافع عن التحرش وقله الأدب انا عايز بس اعرف لو كان ورده تحرش مع فتاه تكون قريبتك ولا معرفه كان هيبقى ردة فعلك ايه كنت هتحارب أنه يرجع تانى المنتخب ويلعب ويمثل منتخب مصر منتخب ( الساجدين ) اقصد المتحرشين صدقنى كنت كسرت رقبته وكنت قولت لا انا لا هوه إنما تقعد مع ابو ريده وتقوله ورده يرجع يبقى فيه حاجات غلط فى المنتخب ده وهتبان الأيام الجايه واللى هيدفع ضريبه التحرش هو الجمهور .

اليوم الثامن

** اتحاد الكوره

عرفت تنظم بطوله على ارضك ووسط جمهورك وخليت العالم يتكلم عنك بطريقه محترمه وعرفت فى مده بسيطه حسبة اربع شهور تقول للعالم وتوصل رساله أن مصر هى بلد الأمن والأمان ونقدر ننظم بطوله قاريه كبيره وتطلع بالشكل ده وطبعا كل ده على المستوى الخارجى وظبطت الدنيا وخليتهم يتكلموا عنك أما على المستوى الداخلى وارساء المبادئ والقيم ومعاقبه المخطئ والغلطان النتيجه ( صفر ) الصراحه اتحاد الكوره عمل زى مدير العمل تلاقيه مكسر الدنيا فى شغله وعامل حالة انضباط ومسيطر والكل بيخاف منه وبيعمله احترام ولما يخلص شغله ويروح على البيت يبقى عامل زى ( الفرخه الدايخه )قدام مراته لابيعرف يهش ولا يعرف ينش ولانفس ولاحس ولاخبر ياريت تختشوا على دمكم وتنضفوا نفسكم الأول علشان تعرفوا تحكموا وتسيطروا .

** منتخب مالى

الفريق ده منظم ومحترم معاه لياقه وحسن أداء وانتشار جميل جدا وهيحتل مكانه كويسه جدا فى الترتيب النهائى لبطوله افريقيا وافتكروا الكلام ده كويس من الأخر عينه على البطوله وواخدها جد ومش جايين يهزروا ولا ( يتحرشوا ) عندهم مهمه عينهم عليها واى منتخب هيقابله هيغنى وبصوت عالى ( كان مالى ماكنت فى حالى )

اليوم الثامن