اليوم الثامن
تلغراف إلي:
اللجنه المنظمه لبطولة الخياريه
لازم اشيد بقرارات اللجنه المنظمه فى دورة الخياريه بقيادة اللى ( مابيهزرش ) جمال الماوردي وقدرت اللجنه انها تاخد قرارات صارمه رادعه ضد بعض لاعبي سرسو البرامون وفادى فون اللى خرجوا عن الروح الرياضيه وكان سوء السلوك طريقهم وعلى طول كان القرار الرادع ضد هؤلاء المشاغبين بعد تقرير كابتن العويلى الصارم يعنى لما يكون فيه شطب ومنعهم من اللعب سنتين وإيقاف ده هيدى إنطباعات لكل اللاعبين بعد كده أنهم يلتزموا واللى هيبعد عن الروح الرياضيه هيكون مصيره أنه يقعد فى بيته ويتفرج من بعيد ( بس ياريت اللجنه ماترجعش فى كلامها ) ومعلش ونقدم تظلم واحنا قرايب وحبايب ونسايب والكلام ده ولازم اللعيبه دى تعرف انها مش بتلعب فى تكيه ولا فى حاره وكل لاعب يعمل اللى هوه عايزه ومع احترامى للفرقتين وبدون زعل اللعيبه بتعمل اللى هيه عايزاه وتعمل سلوك وخروج عن الروح الرياضيه علشان مش عندهم مراكز شباب ومافيش ثواب وعقاب وده وجهة نظرى والمفروض بطوله كبيره زى دى يبقى لها قواعد وتبعد عن المجاملات وده بحبه وده بكرهه وده مش على هوايا وبجد عايز اعرف فريق فادى فون تبع مين ولأى قريه ولو اللعيبه دى عملوا كارثه ومصيبه هنحاسب مين ونقول يامين وبقول لمجلس الإدارة جاملوا بس مش على حساب البلد وطالما ظهرت عقوبات كبيره زى دى يبقى الحدث كان كبير وممكن يحصل كارثه وربنا ستر بلاش نجامل على حساب فرق لها مراكز شباب ولها جمهور كبير انتم متعنتين معاهم بطريقه مستفزه وتجاملوا فرق مانعرفش عنهم اى حاجه وجايين منين ومين المسئول عنهم ياريت تراجعوا حساباتكم وبلاش تعنت اكتر من كده ومجاملات ومحسوبيه .
محمد العويلي
الجزار ( Butcher ) مش بالمفهوم اللى نعرفه ذبح وتقطيع وتعليق وبيع وشراء لأ إنما جزار بمفهوم تانى خالص ذبحت وقطعت بمداد قلمك سوء السلوك والأخلاق وقضيت على البلطجه بعد كل ده لازم الفرق كلها بعد كده تعرف أن الأدب والسلوك الطيب هوه اللى هيسود وغير كده ومعاك هيبقى ( سمعنى بودعك ) وكمان لما يعرفوا انك اللى هتحكم هيلتزموا ويتعلموا ازاى يتعاملوا مع بعض داخل الملعب ويعرفوا أن فيه ثواب وعقاب وتلاقى معظم الفرق بتدعى وتقول يارب العويلى مايحكمش لنا كنت فين من زمان .
كامل سلام
عجبنى اوى اوى الفيديو الأخير اللى عملته وبتوجه فيه رساله للمدرسين اللى بيعطوا دروس خصوصيه أنهم مايكنوش قاسيين على الطلبه وأهاليهم ويعرفوا الفقراء منهم ومايخدوش منهم فلوس لأن فيه ناس معدمه ومش هتقدر تدفع الرسوم المقرره من المدرسين وقلت فى الفيديو لو عندك عشرين طالب ومنهم خمس طلاب فقراء ايه المانع أن المدرس ما ياخودش منهم وكمان فيه طلبه ممكن يدفعوا ( نص تذكره ) انا شايف انها رساله جميله ومؤثره وسمعت الفيديو اكتر من مره وبقول لو المدرسين شافوا الفيديو ده اكيد هيستجيب كتر منهم لمطالبك المشروعه استاذ كامل ومش هيأثر عليهم كتير ويعتبروها انها صدقه جاريه هوه حد لاقى اليومين دول يعمل صدقه جاريه الف شابو لرسالتك استاذ كامل ونداءاتك ومليون شابو للمدرسين اللى هيستجيبوا .
