هانعيش الشهر الجاى على مستوى المؤسسات الصحفية شهر عسل ، شهر كله بوس وأحضان ، أوعى بس تفهمني غلط وتقول أيه الكلام اللي بتقوله ده ميصحش كده .
قبل ما تفهمنى غلط أنا أقصد إننا فى صدد انتخابات مجلس إدارة وجمعية عمومية ، بعد شهر ، يعنى هاتعيش شهر زي العسل هاتسمع أحلى كلام وهاتشوف أجمل الأحضان من المرشحين
شوفت بقى أنت أتسرعت وفهمتني غلط ازاى
بص بقى يا زميلى هاتتباس وتتحضن من أنواع كتير من المرشحين
هاتقولى هو المرشحين أنواع؟
هاقولك يوووهه كتيرررر ..
أنا قعدت شويه كده مع نفسي أصنفهم لاقيتهم مثلا
المرشح السوسته
وده المرشح اللي مالوش مالكه
تلاقيه معاك وفى نفسي الوقت مع التانيين
يفطر معاك ويتغدا معاهم
بيأيد رأيك وفى نفس الوقت رأيهم
يقولك أنت اللي في قلبي من جوه
وسبحان الله برضه الباقيين في قلبه من جوه .
المرشح المونون .
وده المرشح اللي قاعد كده فى لحظة تجلى مع عياله
وفاجأه يقولهم اسكتوا مش عندنا انتخابات فى الشغل
يقولوله والنبى ياابو فوزى ؟
طيب ما تدخل يا راجل علشان تفرح العيال
يروح جرى على الشغل يرشح نفسه ، من باب أهي حاجه تفرح العيال .
المرشح المصلحجى .
ده بقى المرشح اللي عارف داخل ليه وعلشان إيه وناوي يعمل إيه .
بس طبعا هاتلاقيه بيقولك انا داخل علشانك
وعلشان أجيبلك حقوقك الضايعه وهاقلب الدنيا علشانك .
بس لو شاطر ابقي قابلني .
المرشح العادة .
ده المرشح اللى بتشوفه فى كل الانتخابات
وما شاء الله عليه أستاذ سقوط
بس دى عادة يا جماعة وربنا ما يقطع لكم عادة .
المرشح المفاجئ .
ده المرشح اللى بيعرف إن فى انتخابات
هوب تطق فى دماغة يقولك انا هارشح نفسي
تقوله هاتترشح إيه ؟ يقولك مش فارقه اى حاجه
وده هانشوف منه كتير
هاتلاقيه كده مرشح لذيذ ودمه خفيف ومش فارقه معاه ينجح ولا لاء.
المرشح الإشمعنى .
وده بقى المرشح اللي يقول انا هانزل الانتخابات
اشمعنى فوزي وفوزيه نازلين .
عنده حق بصراحة .. هو فوزي أحسن منه في إيه .
المرشح المبلور .
ده المرشح اللي شكله كويس كده وابن ناس
يقابلك يقولك أنا كل واحد يقابلنى يقولي رشح نفسك فى الانتخابات
أنت كويس وهاتعرف تتكلم
فأنا بلورت الفكرة في دماغي وقررت أدخل الانتخابات .
المرشح الشللي .
وده بقى المرشح اللي تلاقيه معتمد على شلته وشِلل أصاحبه
ويقعد يربط ويظبط بينهم ، وغالبا بينجح بيهم .
المرشح الطفاش .
وده بقى المرشح اللي بيترشح علشان يعمل تفتيت أصوات
وغالباً بيكون بتوجيهات من حد معين أو من بعض المرشحين نفسهم .
المرشح الطموح .
وده بقى المرشح اللي عنده طموح شخصي عايز يحققه
ومايمنعش شويه طموح كده للصالح العام .
المرشح المثالى .
وده المرشح اللي شخصيته قويه وكلمته سيف
وصاحب رأى وفكر ورؤية مستقبليه
وغالبا هو اللى بينطلب منه انه يدخل الانتخابات
لتمتعه بثقة زملاءه فيه .
حد طبعاً هايقولي أنت كده لخبطني ومش عارف أعمل إيه وأختار إزاى
هاقوله بسسس … إهدى كده ومتشغلش بالك ، الموضوع بسيط خالص ..
الأول لازم تعرف إن كل المرشحين دول زمايلنا وحبايبنا ، وعمرنا ما نغلط فى حد فيهم لأنهم كلهم ناس محترمه وزى الفل ، أنا بس بقولك النماذج اللي تقدر تختار بينهم ، علشان تقدر تعرف أهمية صوتك
يعنى لازم تبقى عارف إن صوتك مهم جداً وغالى جداَ
مش غالى يعنى هاتبيعه .. لاء
غالى يعنى تحافظ عليه ومتخليهوش يتسرق منك
غالى علشان تديه للى يستاهله
غالى علشان أنت اللى بتحدد مين اللى يتكلم بلسانك
غالى علشان انت اللي بتحدد مين اللي يقدر يعبر عن آرائك
غالى علشان ماتضيعش حقوقك
غالى علشان ماتندمش على سوء اختيارك .
هاتقولى طيب أعمل إيه ؟
هاقولك يا زميلي …
حاول تنتخب المرشح المجرد .
شوفت بقى فهمتني غلط تاني أهووه
أنا أقصد المرشح المجرد من أي أهواء شخصية
وتعمل معايير بسيطة كده للمرشح اللي يقدر يمثلك
زى مثلا يكون مرشح نزيه وأمين وصادق ، صاحب أخلاق وقدوه فى حسن التعامل مع الآخرين
يكون عنده القدرة على التحكم في النفس وضبطها علشان يقدر يكظم غيظه ويضبط نفسه فى موجهة المشكلات الكثيرة اللي هاتقابله
يكون عنده شخصية قادرة على اتخاذ القرارات الصحيحة ، حتى يستطيع المشاركة في التغييرات والخطط والمشاريع
يكون عنده حماس ومثابرة وروح المبادرة في التطوير والتحديث ومواكبة التقنيات وخاصة في تطوير الاستثمارات
يكون عنده ولاء وحب وارتباط بمؤسسته
يكون حريص على التواصل مع الناخبين وعلى تنفيذ برنامجه الانتخابي
يكون عنده استقلالية بذاته وارتباط بجانب مؤسسته وناخبيه لا بأشخاص محدده .
وفى النهاية أتمنى النجاح والتوفيق لمن يستحق ويولى الله من يصلح .
