إنجي يوسف تكتب بالعامية:.محفظتي اتسرقت.
محفظتي إتسرقت
كل واحد فينا عنده مجموعه من الصور والذكريات محتفظ بيها في مكان أمن يصعب الوصول اليها بتحاول تخفيها عن أقرب الناس ليك. وبتكون اشياء بسيطه. لكن ليها ذكريات في قلبك. صوره قديمه مقصوصه ورقه ورده دبلانه. عمله معدنيه بتتفائل بيها. انا شخصيآ كنت محتفظه بجنيه مهري بأمضاء زوجي. وعمله ورقيه بأمضاء أبي. وصور ليا يتيمه وانا طفله وجعران بتفائل بيه في يوم شيطان سرق مني كل ذكريات عشان طمع في شويه فلوس لاقيمه لهم عندي. سرق ذكرياتي ومقتنياتي البسيطه اللي بحاول كل يوم استرجعهم في خيالي لغلاوتهم في قلبي. كنت مستعده استرجعهم بأضعاف الفلوس اللي طمع فيها. يعني احنا مش بنزعل علي الفلوس تواجدها سهل او عدم تواجدها مش نهايه الدنيا. احنا بنحزن علي ذكرياتنا اللي بتتسرق منا غصب عنا. وبنحاول دايما نحافظ عليها في خيالنا. حافظوا علي اي شيء هيفكركم بزمن جميل عيشتوا. دي خزنتكم في السعاده. وقت ما تحتاجها. هتفتحها وتسترجع كل ايامك الجميله حافظ علي مفتاحها دايما في مكان يكون امين اكتر من محفظتك
